అలరించిన తెలుగు–హిందీ సినీ సంగీత విభావరి

అలరించిన తెలుగు–హిందీ సినీ సంగీత విభావరి

మధుర గీతాలతో ఆకట్టుకున్న గాయనీ గాయకులు

హైదరాబాద్, సెప్టెంబర్ 30 (ట్రైనెట్ న్యూస్): శ్రీ శ్రేష్ట మ్యూజికల్ ఈవెంట్స్ సంస్థ అధ్యక్షురాలు, గాయని, వ్యాఖ్యాత శ్రీమతి సీత గరిమెళ్ల ఆధ్వర్యంలో ఈ నెల 22న హైదరాబాద్‌లోని చిక్కడపల్లి శ్రీ త్యాగరాయ గానసభలో నిర్వహించిన తెలుగు–హిందీ సినీ సంగీత విభావరి సంగీతాభిమానులను విశేషంగా ఆకట్టుకుంది. “మనసు కోవెలగా… మమతల మల్లెలుగా…” పేరుతో నిర్వహించిన ఈ కార్యక్రమంలో పలువురు గాయనీ గాయకులు పాత, కొత్త సినీ గీతాలను ఆలపించి ప్రేక్షకులను మంత్రముగ్ధులను చేశారు.

మంగళవారం మధ్యాహ్నం 3 గంటల నుంచి రాత్రి 9 గంటల వరకు జరిగిన ఈ సంగీత కార్యక్రమంలో తెలుగు, హిందీ చిత్రాలకు చెందిన సుమధుర గీతాలను కళాకారులు తమదైన శైలిలో ఆలపించారు. గాయకుల గాన ప్రతిభకు ప్రేక్షకుల నుంచి విశేష స్పందన లభించింది. ప్రతి పాట ముగిసిన అనంతరం సభికుల కరతాళధ్వనులతో గానసభ ప్రాంగణం మార్మోగింది.

గాయకులు హేమ హారిక, అనురాధ, కృష్ణవేణి, శోభ, దుర్గతో పాటు సుబ్బారెడ్డి, భీమేశ్వరరావు, సుబ్రహ్మణ్యం, లక్ష్మీనారాయణ, ఏవీఆర్ రత్నం, ఆనంద్, నరేంద్ర, వెంకటరెడ్డి తదితరులు తమ గానంతో అలరించారు. కార్యక్రమానికి హాజరైన ప్రముఖులు కళాకారుల ప్రతిభను అభినందించారు.

సంగీతం మనసుకు ప్రశాంతతను అందించడంతోపాటు మానవ సంబంధాలను మరింత బలోపేతం చేస్తుందని వక్తలు పేర్కొన్నారు. ఇటువంటి కార్యక్రమాల ద్వారా వర్ధమాన గాయనీ గాయకులకు మంచి వేదిక లభిస్తుందని తెలిపారు. కళలు, కళాకారులను ప్రోత్సహించేందుకు శ్రీ శ్రేష్ట మ్యూజికల్ ఈవెంట్స్ చేస్తున్న కృషిని ప్రశంసించారు.

ఈ కార్యక్రమాన్ని ట్రైనెట్ లైవ్ టీవీ, గానసభ టీవీ 1966 ద్వారా ప్రత్యక్ష ప్రసారం చేశారు. కార్యక్రమం విజయవంతం కావడానికి సహకరించిన అతిథులు, కళాకారులు, సంగీతాభిమానులకు నిర్వాహకులు కృతజ్ఞతలు తెలిపారు.